هاوڕى كه‌ماڵى سه‌ڵه‌واتى ساڵى 1337 له‌ شارى سنه‌ له‌ دایك بوو. خوێندنى سه‌ره‌تایى تا كلاسى پێنجه‌م درێژه‌ پێدا. پاشان رووى كرده‌ كرێكارى كردن. پێش راپه‌ڕینى 1357 له‌گه‌ڵ مه‌سایلى سیاسى ئاشنا بوو وه‌ له‌ سه‌رجه‌مى میتینگ و ته‌حه‌سون و خۆپیشاندانه‌كانى خه‌ڵكى شارى سنه‌ به‌دژى رژیمى شا له‌و ده‌ورانه‌دا به‌شدارى كرد. به‌دواى راپه‌ڕینیشدا هه‌ر له‌و مه‌یدانه‌ له‌ خه‌بات مایه‌وه‌.

له‌ جه‌ره‌یانى هێرشى دووهه‌مى رژیم بۆ شارى سنه‌ له‌ به‌هارى 1359دا و موقاومه‌تى مێژوویى پێشمه‌رگه‌ و خه‌ڵكى تێكۆشه‌رى شارى سنه‌، هاوڕێ كه‌ماڵ وك هه‌ڵسووڕاوێكى شۆڕشگێڕى كۆمه‌ڵه‌ هه‌ڵسووڕانه‌ به‌شدارى كرد. له‌ مانگى جۆزه‌ردانى ساڵى 1359 به‌ ریزه‌كانى كۆمه‌ڵه‌ په‌یوه‌ست بوو.

له‌ رێكه‌وتى 27/12/1359 له‌ ئاكامى ته‌قینه‌وه‌ى مینێك له‌ یه‌كێك له‌ مه‌قه‌ره‌كانى كۆمه‌ڵه‌ له‌ ئاوایى عه‌سراواى ناوچه‌ى كامیاران گیانى به‌خت كرد.