به‌ یادی هاورێ ناجی غه‌فووری  هه‌ڵسووراوی تێکۆشەر و شورشگێری كۆمه‌ڵه‌

هاورێ ناجی غه‌فووری هەڵسوراوی ته‌شكیلاتی كۆمه‌ڵه‌ ساڵی 1334 له‌ خانه‌واده‌یه‌كی ده‌ستكورتی شاری بانه‌ له‌ دایك بووە . ده‌ورانی خویندنی ناوه‌ندی له‌و شاره‌ تێپه‌ر كرد و دوای ئه‌وه‌ بو دریژه‌دان به‌ خویندن چووه‌ دانشگای ته‌وریز. هاورێ ناجی له‌ ده‌ورانی دەبێرستان له‌ گه‌ڵ مه‌سایلی سیاسی ئاشنا بووە و لە گەڵ چەند هاورێیەکی هەستەیەکی چەپی خەباتکارانەیان پێک هێناوە و لە راکێشانی خوێندکارانی ئەو سەردەمە بەرەو خەبات وتێکۆشان لە دژی نیزامی دیکتاتوری شا دەوری گێراوە ، ژیانی فەقێرانەی بنەماڵەکەی و وردبوونەوەی لە ژیانی خەڵکی کرێکار و زەحمەتکێش ، رەنجی لە رادە بەدەر وچەوسانەوەی بی سنوری ئەوان وبێرکردنەوە لە رێگای رزگار بوونی ئێنسان لەدەست ستەم وهەڵاواردن ، هاورێ ناجی بەرەو کومونیزم و زانستی رزگاری ئێنسان لە دەست بێعەداڵەتی کۆمەڵایەتی راکێشا ، هەر بۆیە هەمو کات هەڵسوراوێکی مەیدانی خەبات وتێکۆشان بوو ،  له‌ خه‌باتی دانشجویی ئه‌و سه‌رده‌مه‌دا هه‌لسووراوانه‌ به‌شداری كرد و ده‌وری به‌رچاوی گێرا.

هاورێ ناجی لاوی پرشورو شه‌وق و شورشگیر و کومونیست ساڵی  ١٣٥٨ خەبات و تێکۆشانی خۆی بە كۆمه‌ڵه‌وە گرێدا و له‌ ته‌شكیلاتی نه‌هینی كۆمه‌ڵه‌دا ئه‌ركی سیاسی و شورشگیرانه‌ی به‌ریوه‌ برد و لێهاتوانه‌ و بەو په‌ری دلسوزی و فیداكارییەوە ئه‌ركه‌كانی به‌ریوه‌ ده‌برد. یه‌كێك له‌ روژه‌كانی مانگی خه‌زه‌لوه‌ر ساڵی 60 هاورێ ناجی له‌ لایه‌ن به‌كریگیراوانی رژیمی ئیسلامی یه‌وه‌ ده‌ستگیر و زیندانی كرا.

هاورێ ناجی له‌ زیندان ئیتلاعاتی سپای پاسداران و له‌ سلوولی تاكه‌ كه‌سی دا خرایه‌ ژیر توندترین شكه‌نجه‌ی به‌كریگیراوانی رژیم به‌و هیوایه‌ی كه‌ لێوی نه‌هینی پاریزی بكه‌نه‌وه‌ و ته‌سلیمی خۆیانی بكه‌ن، به‌ڵام وره‌ی پولایینی هاورێ ناجی هه‌موو نه‌قشه‌ و پیلانەکانی دوژمنی پووچه‌ل كرده‌وه‌ و سه‌رئه‌نجام له‌و په‌ری زه‌بوونی و داماوه‌ی دا روژی 3ی سه‌رماوه‌زی ساڵی 60 به‌كریگیراوانی رژیم هاورێ ناجی یان ئیعدام كرد و به‌مجوره‌ ژیانی سه‌راسه‌ر سه‌رفرازی و شورشگیرانه‌ی كوتایی پێ هات.

یادی هاورێ ناجی غه‌فووری به‌ریزه‌ و رێگای پر له‌ شانازی تاگەیشتن بە ئامانجەکانی بەردەوامە.