به‌رز وبه‌رێزه‌ یادی ئازیز و هه‌میشه‌ زیندووی هاروێ كه‌ریمی عه‌زیزی،
 پێشمه‌رگه‌ی وشیار و فیداكاری كۆمه‌ڵه‌

هاورێ كه‌ریم ساڵی ١٣٤٣ی هه‌تاوی له‌ نێو بنه‌ماڵه‌یه‌كی زه‌حمه‌تكێش و ده‌ست كورت له‌ ئاوایی جه‌میانی سه‌ر به‌ ناوچه‌ی سه‌قز چاوی به‌ژین پشكووت.

له‌ ده‌ورانی منداڵی ئه‌م ئازیزه‌دا بنه‌ماڵه‌كه‌یان به‌ره‌ و ئاوایی تورجان وه‌رێ كه‌وتن و لەو ئاواییه‌ نیشته‌جێ بوون.

له‌ به‌ر ته‌نگده‌ستی و نه‌داری بنه‌ماڵه‌كه‌یان هه‌ر له‌ یه‌كه‌مین رۆژانێكه‌وه‌ كه‌ خۆی ناسی به‌كاری شوانییه‌وه‌ مه‌شغوڵ بوو كه‌ دواجار توانی شان به‌ شانی ئه‌وه‌ی كه‌ كاری ده‌كرد له‌ كاتی كرانه‌وه‌ی مه‌رده‌سه‌كاندا برواته‌ مه‌دره‌سه‌ و خه‌ریكی ده‌رس خوێندن بێت.

پاش رووخانی په‌هله‌وی و به‌ ئاشكرا بوونی تێكۆشانی كۆمه‌ڵه‌ و له‌وكاته‌دا كه‌ كۆمه‌ڵه‌ له‌ ئاوایی تورجان مه‌قه‌ری دانابوو، له‌گه‌ڵ خه‌بات و موقاوه‌مه‌تی ئه‌و ده‌وره‌یه‌ی كۆمه‌ڵه‌ تێكه‌ڵاو و بوو و كۆمه‌ڵێك ئه‌ركی ته‌شكیلاتی وه‌ئه‌ستۆ گرت و به‌ وشیاری و به‌شور و شه‌وقه‌وه‌ به‌رێوه‌ی ده‌بردن.

پاییزی ساڵی ٥٩ هاته‌ ریزی پێشمه‌رگه‌ی كۆمه‌ڵه‌وه‌ و تێكۆشانی خۆی له‌م مه‌یدانه‌دا درێژه‌ پێدا.

له‌ ریزی پێشمه‌رگه‌دا، كه‌سێكی له‌ خۆ بردوو و له‌ ئاستی كار و تێكۆشانییه‌وه‌ به‌ ده‌ربه‌ست و جیدی بوو.

له‌ زۆربه‌ی مه‌یدانه‌كانی رووبه‌روو بوونه‌وه‌ی هاورێیانی گوردانی ٢٤ی سه‌قز له‌ به‌رانبه‌ر پارێزه‌رانی سه‌رمایه‌ و چه‌وساندنه‌وه‌دا، به‌ ئازایه‌تی و وره‌یه‌كی شۆرشگێرانه‌وه‌ ئاماده‌ بوو.

رێكه‌وتی ٢٣ی سه‌رماوه‌زی ١٣٦١ی هه‌تاوی، له‌ جه‌ریانی شه‌رێك كه‌ له‌سه‌ر رێگای بانه‌ سه‌قز له‌ نێوان واحێدێك له‌ پێشمه‌رگه‌كانی كۆمه‌ڵه‌ و هێزه‌كانی رژیمی ئیسلامی روویدا، پاش شه‌رێكی قاره‌مانانه‌ و زه‌ربه‌ لێدانێكی قورس و كاریگه‌ر له‌ هێزه‌كانی دوژمن، هاورێ كه‌ریمی عه‌زیزی، پێشمه‌رگه‌ی وشیار و فیداكاری كۆمه‌ڵه‌، گیانی له‌ رێگای ئازادی و سۆسیالیزمدا به‌خت كرد.

یادو رێگای پیرۆزی تا گه‌یشتنی به‌ رزگاری یه‌كجاری به‌رده‌وامه‌.