به‌رێزه‌ یادی شۆرشگێری كۆمۆنیست و سیمای خۆراگری نێو سیاچاڵه‌كانی رژیمی ئیسلامی، هاورێ عه‌لی ئه‌كبه‌ری سه‌عیدی موباره‌كه‌

كرێكاری وشیار و كۆمۆنیست هاورێ عه‌لی كه‌ له‌ ریزی تێكۆشه‌ران و شۆرشگێرانی كۆمۆنیستدا به‌ نێوی محه‌ممه‌د ده‌ناسرێته‌وه‌ رۆڵه‌ی بنه‌ماڵه‌یه‌كی كرێكاری له‌ جنوبی ئێران بوو كه‌ باوكی له‌ شیركه‌تی نه‌وتی جنوب كاری ده‌كرد.

ده‌ورانی منداڵی و لاویه‌تی خۆی له‌ نێو گه‌ره‌كه‌ كرێكارییه‌كانی شیركه‌تی نه‌وت تێپه‌ر كرد و هه‌ر له‌ ته‌مه‌نی ١٢ساڵه‌یه‌وه‌ وێڕای ده‌رس خوێندن بۆ یارمه‌تیدان به‌ باری بژیوی بنه‌ماڵه‌كه‌یان رووی كرده‌ بازاری كار و ده‌ستی به‌كار كردن كرد.

پاش وه‌رگرتنی مه‌دره‌كی دیپلۆم له‌ شیركه‌ته‌ ساختمانیه‌كانی جنوب مه‌شغوڵی كار كردن و نه‌قشه‌ به‌رداری بوو.

حوزوری له‌ نێو كرێكاران و ئاشنایه‌تی له‌گه‌ڵ كۆمه‌ڵێك كرێكاری وشیار و ماركسیست ئه‌وی به‌ره‌و لای تێكۆشان و خه‌باتی چینایه‌تی هاندا.

له‌ كاتی راپه‌ڕینی جه‌ماوه‌ری خه‌ڵكی ئێران له‌ دژی سته‌م و هه‌ڵاواردنه‌كانی رژیمی په‌هله‌وی، له‌ ریزی كرێكارانی وشیار و نارازیدا، یه‌كێك له‌ چالاكان و هه‌ڵسووڕاوانی ئیعترازات و خۆپێشاندانه‌كانی ئه‌م ده‌ورانه‌ بوو.

پاش راپه‌رین به‌ حوزوری له‌ نێو كرێكارانی بێكار له‌ شاری كه‌ره‌ج له‌ ئه‌مری رێكخستن و به‌ره‌وپێش بردنی خواست و داواكاریه‌كانی ئه‌وان ده‌ور و نه‌قشێكی یه‌كجار كاریگه‌ری نواند.

ماوه‌یه‌ك په‌یوه‌ندی به‌ گروهی رزگاری زه‌حمه‌تكێشانه‌وه‌ گرت و له‌ ئاخره‌كانی ساڵی ٥٩دا وێرای كۆمه‌ڵێكی دیكه‌ له‌ هاورێیانی به‌ ئیتحادی موبارزانی كۆمۆنیسته‌وه‌ په‌یوه‌ست بوون.

هه‌ر له‌ سه‌ره‌تاكانی په‌یوه‌ندی گرتن له‌گه‌ڵ ئیتحادی موبارزان، توانایی و مه‌سئوولیه‌ت په‌زیری خۆی له‌ پێناو به‌ره‌وپێش بردنی تێكۆشانی كۆمۆنیستی له‌ خۆی نیشاندا و توانی ببێت به‌ ئه‌ندامی ئه‌و رێكخراوه‌یه‌.

هاورێ عه‌لی خاوه‌ن گه‌لیك تایبه‌تمه‌ندی شۆرشگێرانه‌ بوو، توانایی له‌ بواری رێكخستنه‌كان و ته‌بلیغی شه‌فافی سیاسه‌ت و رێبازی كۆمۆنیزم له‌ نێو جه‌ماوه‌ردا له‌گه‌ڵ مه‌تانه‌ت و وره‌ی به‌رزی شۆرشگێرانه‌ی ئه‌م خۆشه‌ویسته‌ سیماێكی جێگای باوه‌ر و هه‌رگیز له‌بیر نه‌كراوه‌ی له‌ نێو كرێكاران و زه‌حمه‌تكێشانی پێبه‌خشیبوو.

بۆ به‌رێوه‌بردنی مه‌ئموریه‌تی ته‌شكیلاتی له‌ شاری ئیسفه‌هان سازماندرا و پاش ماوه‌یه‌ك وه‌ك ئه‌ندامی كۆمیته‌ی ئه‌و شاره‌ هه‌ڵبژێردرا.

پاییزی ساڵی ٦١ وێرای كۆمه‌ڵێكی دیكه‌ له‌ هاورێیانی تێكۆشه‌ر له‌ شاری ئیسفه‌هان به‌ده‌ست هێزه‌ سه‌ركوتگه‌ره‌كانی رژیمی ئیسلامی ده‌ستگیر و ره‌وانه‌ی زیندان كران.

پارێزه‌رانی سه‌رمایه‌ وه‌ك پێشه‌ی هه‌میشه‌ییان، ئه‌م ئازیزه‌یان خسته‌ ژێر سه‌خت ترین ئه‌شكه‌نجه‌ و ئازار و ته‌نانه‌ت مولاقاتی له‌گه‌ڵ بنه‌ماڵه‌ و ده‌ره‌وه‌ی زیندانی لێ قه‌ده‌غه‌ كرا.

له‌ مانگی سه‌رماوه‌زی ١٣٦٢دا، شۆرشگێری كۆمۆنیست و سیمای خۆراگری نێو زیندان، هاوڕێ عه‌لی ئه‌كبه‌ری سه‌عیدی موباره‌كه‌، ته‌نیا به‌ تاوانی هه‌ڵسووڕان له‌ نێو كرێكاران بۆ گه‌یشتن به‌ مافه‌ ره‌واكانیان، به‌ده‌ست هێزه‌كانی رژیمی ئیسلامی ئێعدام كرا و به‌ریزی گیانبه‌ختكردوانی ئازادی و سۆسیالیزم په‌یوه‌ست بوو.

بژی یادی ئازیز و هه‌میشه‌ زیندوی.