به‌رز و به‌رێزه‌ یادی ئازیز و هه‌میشه‌ زیندووی، هاورێ عه‌لی قادرزاده‌، شۆرشگێری ریزه‌كانی كۆمه‌ڵه‌ و سیمای خۆراگری نێو زیندانه‌كانی رژیمی ئیسلامی

هاورێ عه‌لی قادرزاده‌ ساڵی ١٣٣٥ی هه‌تاوی، له‌ داوێن بنه‌ماڵه‌یه‌كی كرێكاری له‌ شاری مه‌هاباد چاوی به‌ژین پشكووت.

هه‌رله‌ ده‌ورانی منداڵییه‌وه‌ له‌گه‌ڵ كار و مه‌ینه‌تیه‌كانی ژیانی ئه‌م سه‌رده‌مه‌ ئاشنا بوو، هه‌لومه‌رجی ناله‌باری ژیان نه‌یتوانی پێش به‌ خوێندنی ئه‌م ئازیزه‌ بگرێت و تووانی به‌ هه‌وڵ و تێكۆشان و زاڵ بوون به‌سه‌ر كه‌م و كۆرییه‌كانی ژیان ده‌ورانی خوێندنی ده‌بیرستان به‌ئه‌نجام بگه‌یه‌نێت و پاشان له‌ دانشگا درێژه‌ به‌ خوێندن بدات.

هاورێ عه‌لی قادرزاده‌ له‌ نێو هاورێیانی و ئه‌و كه‌سانه‌ی كه‌ ده‌یانناسی خاوه‌ن كه‌سایه‌تییه‌كی جێگا متمانه‌ و خۆشه‌ویستی هه‌مووان بوو.

به‌ ده‌ستپێكردنی خه‌باتی جه‌ماوه‌ری خه‌ڵكی ئێران له‌ دژی رژیمی په‌هله‌وی، هه‌موو هه‌وڵی خۆی خسته‌ گر و به‌شداری له‌ رێپێوان و ناره‌زایه‌تییه‌كانی ئه‌م ده‌ورانه‌دا كرد.

پاش رووخانی رژیم، په‌یوه‌ندی به‌ كۆمه‌ڵه‌وه‌ گرت و وه‌كو هه‌ڵسووراوێكی وشیار و پێشره‌و ده‌ستی دایه‌ كاری ته‌شكیلاتی.

هاورێ عه‌لی به‌ هۆی دڵسۆزی و به‌ده‌ربه‌ست بوونی له‌گه‌ڵ زه‌حمه‌تكێشان و كرێكاران ببوو به‌ یه‌كێك له‌ سیما خوشه‌ویست باوه‌ر پێكراوه‌كانی نێو شاری مه‌هاباد و یه‌كێك له‌ رابه‌رانی خه‌باتی كۆمه‌ڵایه‌تی له‌و شاره‌.

له‌ درێژه‌ی كار و هه‌ڵسوورانی له‌گه‌ڵ ته‌شكیلاتی كۆمه‌ڵه‌، ساڵی ١٣٦١ بوو به‌ جێگری ئه‌ندامی كۆمیته‌ی شاری مه‌هاباد و دواجار له‌ به‌هاری ساڵی ٦٢ بوو به‌ ئه‌ندامی ئه‌و كۆمیته‌یه‌.

هێزه‌كانی رژیمی ئیسلامی كه‌ ئه‌م ئازیزه‌یان پێشتر شناسایی كردبوو له‌ مانگی گه‌لاوێژدا هێرش ده‌كه‌نه‌ سه‌ر ماڵه‌كه‌ی و پاش ده‌ستگیر كردنی ره‌وانه‌ی زیندانی ده‌كه‌ن.

به‌كرێگیراوانی رژیم كه‌ زانیبوویان ئه‌م ئازیزه‌ كه‌ێكی ناسراوه‌ هه‌موو هه‌وڵی درندانه‌یان خسته‌ گر تا به‌ڵكوو په‌ی به‌ نهێنی و په‌یوه‌ندییه‌كانی ئه‌م ئازیزه‌ له‌گه‌ڵ هاورێیانی ببه‌ن.

هه‌ر كات كه‌ هاورێ عه‌لی وڵامی ئه‌شكه‌نجه‌گه‌رانی ده‌دایه‌وه‌، به‌سه‌ردانی دروشمی بژی سۆسیالیزم و خوێندنه‌وه‌ی سرود زوبوونی و ناره‌وا بوونی پارێزه‌رانی سه‌رمایه‌ی پێ نیشان ده‌دان.

له‌ ئاخرین چاوپێكه‌وتنی له‌گه‌ڵ بنه‌ماڵه‌كه‌ی روو له‌ دایكی ره‌نجكێشاوی ده‌ڵێت، دایه‌گیان به‌ ئامانجی به‌رزمان سوێندت ده‌ده‌م كه‌ پاش مه‌رگم نه‌گریت و به‌ڵێنیت لێ ده‌ستێنم كه‌ خه‌می له‌ده‌ست دانی من بكه‌یته‌ ئاور و بیرژێنیته‌ سه‌ر دوژمنانی چه‌وسێنه‌ر و سه‌ركوتگه‌ردا.

رۆژی ١١ گه‌لاوێژی ١٣٦٢ی هه‌تاوی ئه‌ندامی كۆمیته‌ی ته‌شكیلاتی شاری مه‌هاباد شۆرشگێری كۆمۆنیست و سیمای خۆشه‌ویستی خه‌ڵكی ئه‌م ناوچه‌ هاورێ عه‌لی قادرزاده‌ به‌ده‌ست هێزه‌كانی رژیمی ئیسلامی ئێعدام كرا و به‌ ریزی گیان به‌خت كردوانی سۆسیالیزم په‌یوه‌ست بوو.

به‌ درێژه‌ پێدان به‌ رێگای پێرۆزی رێز له‌ یادی ئازیز و هه‌میشه زیندووی ده‌گرین.‌