به‌رز و به‌رێزه‌ یادی ئازیز و هه‌میشه‌ زیندووی، هاورێ فریشته‌ی عه‌ره‌بیان خۆشخوو، كۆمۆنیستی شۆرشگێر و سیمای خۆراگری نێو زیندانه‌كانی رژیمی ئیسلامی.

هاورێ فریشته‌ له‌و ئینسانه‌ پێشڕه‌و و هه‌ڵكه‌وتووانه‌ی سه‌رده‌می ئێمه‌ بوو كه‌ هه‌تاكوو ئه‌مرۆش جێگه‌ی له‌ ناو ریزی هاورێیانیدا خاڵییه‌ و دوای تێپه‌ر بوونی نزێک بە ٣٠ سال له‌ گیانبه‌ختكردنی هێشتا خۆشه‌ویستی و بزه‌ی هه‌میشه‌یی سه‌ر لێوانی، له‌ سه‌خت ترین كات و ساته‌كانی ژیاندا، له‌ بیر هاورێیانی ناچێته‌وه‌. ته‌نانه‌ت جه‌لادانی رژیم فریشته‌یان وه‌كوو كۆمۆنیستێكی وه‌فادار به‌ ئامانج و به‌ هاورێیانی، ده‌ناسنه‌وه‌ كه‌ به‌ قاره‌مانه‌تی و راوه‌ستاوی له‌ به‌رانبه‌ریان ئه‌وه‌ی سه‌لماندبوو.

هاورێ فریشته‌ی عه‌ره‌بیان خۆشخوو، ساڵی ١٣٣٥ی هه‌تاوی له‌ شاری مه‌شهه‌د چاوی به‌ژین هه‌ڵێنا ، خوێندنی تا كۆتایی ده‌ورانی دانشگا  له‌ بواری ره‌وانشناسی سه‌ركه‌وتوانه‌ به‌ئه‌نجام گه‌یاند.

هه‌ر له‌ ده‌ورانی خوێندنی له‌ دانشگا له‌گه‌ڵ زانستی مارسیزم ئاشنا بوو و پێ نایه‌ مه‌یدانی تێكۆشان و خه‌باتی شۆرشگێرانه‌وه‌.

پاش راپه‌رینی ساڵی ٥٧ چه‌ندین جار هاته‌ كوردستان و په‌یوه‌ندی سیاسی به‌ كۆمه‌ڵه‌وه‌ گرت.

 له‌م ده‌وره‌یه‌دا بوو كه‌ هاورێ فریشته‌ له‌ به‌شی ته‌شكیلاتی نهێنی كۆمه‌ڵه‌  له‌ شاری تاران سازماندرا و ده‌ستی به‌كار و هه‌ڵسوورانی سیاسی كرد و مه‌سئوولیه‌تی ٢ حه‌وزره‌ی كرێكاری گرته‌ ئه‌ستۆ.

له‌ جه‌ریانی هێرشی به‌ربڵاوی رژیم بۆ سه‌ر نه‌یارانی له‌ مانگی گه‌لاوێژی ساڵی١٣٦١ ده‌ستگیر و ره‌وانه‌ی زیندان كرا.

شه‌لاق و ئه‌شكه‌نجه‌ی زیندان له‌ به‌رانبه‌ر وره‌ی به‌رزی شۆرشگێرانه‌ و باوه‌ر به‌ حه‌قانییه‌تی رێبازی كۆمۆنیستی، نه‌یتوانی سه‌ركه‌وێت و هه‌موو هه‌وڵه‌كانی ئه‌شكه‌نجه‌گه‌ران بۆ ده‌ست راگه‌یشتن به‌ نهێنییه‌ ته‌شكیلاتییه‌كانی پووچه‌ڵ مایه‌وه‌.

هێزه‌كانی رژیم له‌ به‌رانبه‌ر خۆراگری و قاره‌مانه‌تی ئه‌م ئازیزه‌ ئه‌وه‌نده‌ بچوك و زه‌بوون بوون كه‌ نه‌یانتوانی هیچ زانیارییه‌كی لێ به‌ده‌ست بێنن،  ته‌نیا توانیان دفاعیاتی ئه‌م ئازیزه‌ له‌ كۆمۆنیزم و خه‌باتی ره‌وای چه‌وساوه‌كان، له‌ كاتی به‌ناو دادگایی كردنیدا، وه‌ك به‌ڵگه‌ی تاوان له‌ دژی به‌كار بێنن.

هاورێ فریشته‌ سه‌ره‌رای ئه‌وه‌ی نموونه‌ی خۆراگری و قاره‌مانه‌تی بوو، پاڵپشت و رێ نیشانده‌ری هاوبه‌نده‌كانی بۆ مۆقاوه‌مه‌ت له‌ به‌رانبه‌ر هێزه‌كانی رژیم بوو و زۆر جێگاێ رێز و خۆشه‌ویستی بوو.

هێزه‌كانی رژیم له‌ كاتێكدا كه‌ ده‌یانویست بیبه‌ن بۆ ئێعدام به‌ پێچه‌وانه‌ی كاری هه‌میشه‌یان كه‌ نێوی ئێعدامییه‌كان لە بڵه‌نگوێ زیندان ده‌خوێنده‌وه‌ تا ترس و خۆف بنێنه‌ ناو دڵی زیندانییه‌كانه‌وه‌، له‌ به‌ندی ٢٤٦ی زیندانی ئه‌وین كه‌ ئه‌م خۆشه‌ویسته‌مانی لێ بوو هه‌موو به‌ندییه‌كانیان له‌ ناو به‌نددا راگرت و له‌ رۆژی ٢٤ی گه‌لاوێژی ساڵی ٦٢، هاورێ فریشته‌ی عه‌ره‌بیان خۆشخوو، هه‌ڵسووراوی شۆرشگێری كۆمه‌ڵه‌ و سمیای خۆراگری نێو زیندانه‌كانی رژیمی ئیسلامی، به‌ده‌ست رژیمی ئیسلامی ئێعدام كراو به‌ كاروانی گیان به‌خت كردوانی رێبازی سۆسیالیزم و ئازادی ئینسان په‌یوه‌ست بوو.

به‌درێژه‌ دان به‌ڕێگای پڕ سەروەری رێز له‌ یادی ئازیزی ده‌گرێن .