به‌رێزه‌ یادی ئازیز و هه‌میشه‌ زیندوی، هاورێ نێعمه‌تی سه‌فاحی، پێشمه‌رگه‌ی وشیار و فیداكاری كۆمه‌ڵه‌

هاورێ نێعمه‌ت له‌ نێو بنه‌ماڵه‌یه‌كی زه‌حمه‌تكێشی شاری سنه‌ چاوی به‌ژین پشكوت.

خوێندنی سه‌ره‌تایی و ناوه‌ندی هه‌ر له‌و شاره‌ به‌ ئه‌نجام گه‌یاند و هه‌ر له‌ ده‌ورانی تازه‌ لاویه‌وه‌ و له‌گه‌ڵ كار و چه‌وساندنه‌وه‌ ئاشنا بوو.

راپه‌رینی ساڵی ٥٧ له‌گه‌ڵ مه‌سائیلی سیاسی ئاشنا بوو وو بیری تیژ و هه‌ست به‌ مه‌سئولیه‌ت كردنی له‌ پێناو ژیانی كرێكاران و به‌شمه‌ینه‌تان سه‌ره‌نجی به‌ره‌ و كار و چالاكی سیاسی راكێشا.

ئه‌م ئازیزه‌ وه‌ك هه‌زاران لاوی دیكه‌ رێگای تێكۆشانی له‌ ریزه‌كانی كۆمه‌ڵه‌دا بینیه‌وه‌ و ماركسیزمی له‌ نێو دڵی تاریكی و نامه‌تیه‌كانی داسه‌پاو به‌سه‌ر ئینسانی ئه‌م سه‌رده‌مه‌دا، كرد به‌ چرای رێگای تێكۆشانی خۆی.

هاورێ نێعمه‌تی سه‌فاحی بۆ ئه‌م مه‌به‌سته‌ مه‌یدانی كار و هه‌ڵسوورانی ئاشكرای ته‌شكیلاتی هه‌ڵبژارد و به‌ ریزی پێشمه‌رگه‌كانی كۆمه‌ڵه‌ په‌یوه‌ست بوو.

دڵسۆزی به‌رێوه‌ بردنی دیسیپلینی ته‌شكیلاتی له‌ پێناو هاورێیان و هه‌موو ئه‌و ئه‌ر‌كانه‌ی كه‌ به‌ ئه‌ستۆێ گرتبوو، بوو به‌ هۆی ئه‌وه‌ی كه‌ به‌رپرسایه‌تی ته‌داروكاتی په‌لێك له‌ پێشمه‌رگه‌كانی بخرێته‌ سه‌ر شان، كه‌ ماندویی نه‌ناسانه‌ و به‌ جدیه‌ته‌وه‌ بۆ ئه‌م كاره‌ تێده‌كۆشا.

له‌ جه‌ریانی هێرشی به‌ربڵاوی هێزه‌كانی رژیمی ئیسلامی بۆ سه‌ر ناوچه‌ی ئالان كه‌ له گه‌ڵ به‌رگری و قاره‌مانه‌تی هاورێیانمان رووبه‌روو بووه‌وه‌، له‌ جیبهه‌ی شه‌ری هۆمل و له‌ رۆژی حه‌وته‌می شه‌ره‌كه‌دا له‌ كاتی په‌لامار بۆ سه‌ر سه‌نگه‌ره‌كانی دوژمن، پێشمه‌رگه‌ی كۆڵنه‌ده‌ر و فیداكاری كۆمه‌ڵه‌، هاورێ نێعمه‌تی سه‌فاحی به‌ توندی بریندار ده‌بێت و پاش ١٢ سه‌عات و سه‌ره‌رای هه‌وڵی زۆری تیمی پزشكی بۆ چاره‌سه‌ر كردنی برینه‌كه‌ ی، به‌داخه‌وه‌ گیانی به‌خت ده‌كات و به‌ ریزی گیان به‌خت كردوانی رێگای ئازادی و سۆسیالیزم په‌یوه‌ست ده‌بێت.

یادی ئازیزی بۆ هه‌تاهه‌تایه‌ له‌ دڵمان زیندوه‌ و رێگای تاسه‌ركه‌وتن به‌رده‌وامه‌.