به‌رز و به‌رێزه‌ یادی ئازیزی هاورێ نوره‌دینی فه‌زلی، پێشمه‌رگه‌ی ئازا و فیداكاری كۆمه‌ڵه‌.

هاورێ نوره‌دینی فه‌زلی ناسراو به‌ به‌هرام، ساڵی ١٣٤٠ی هه‌تاوی له‌ نێو بنه‌ماڵه‌یه‌كی زه‌حمه‌تكێش له‌ شاری میاندواو چاوی به‌ ژین هه‌ڵێنا.

خوێندنی سه‌ره‌تایی و ناوه‌ندی له‌ شاری میاندواو ته‌واو كرد و هه‌ر له‌ ده‌ورانی ده‌بیرستانه‌وه‌ ده‌ستی به‌ كرێكاری كرد و بناغه‌ی وشیاریه‌یكی قووڵ له‌ ده‌روونیدا شكڵی گرت.

ساڵی ١٣٥٧ و پێش رووخانی شا پێی نایه‌ ناو جه‌رگه‌ی خه‌باتی سیاسی ‌و بووبه‌ یه‌كێك له‌ پێشره‌وانی خه‌باتی جه‌ماوه‌ری ئه‌م ده‌وه‌ریه‌ له‌ شاری میاندواو.

پاش رژیمی په‌هله‌وی و هاتنه‌ سه‌ركاری ده‌سه‌ڵاتدارانی ئیسلامی له‌ ئێران، په‌یوه‌ندی به‌ سازمانی په‌یكاره‌وه‌  دەکات ودەبێت به‌ هه‌ڵسووراوی ئه‌و رێکخراوە.

بنه‌ماڵه‌ی ئه‌م ئازیزه‌ كه‌ لەباری ئایینیه‌وه‌ به‌هایی بوون و رژیمی ئیسلامی له‌گه‌ڵیان به‌ توندوتیژی و بێحورمه‌تی به‌ بیروباوه‌ریان هه‌ڵس و كه‌وتی ده‌كرد و ته‌نانه‌ت مه‌ترسی كوشت و بریان ده‌كرا، ساڵی ١٣٥٩ بۆ خۆشاردنه‌وه‌ به‌ ناچاری ره‌وانه‌ی شاری تاران بوون. هاورێ نوره‌دین له‌وێش له‌ په‌یوه‌ندی له‌گه‌ڵ سازمانی په‌یكار درێژه‌ی به‌ كار و چالاكییه‌ سیاسیه‌كانی خۆی دا.

له‌ زستانی ٦١ هاته‌وه‌ كوردستان و په‌یوه‌ندنی به‌ كۆمه‌ڵه‌وه‌ گرت و هاته‌ ریزی پێشمه‌رگه‌كانی كۆمه‌ڵه‌.

سه‌داقه‌ت و رووخۆشی له‌گه‌ڵ زه‌حمه‌تكێشانی ناوچه‌كانی میاندواو و مه‌هاباد و بۆكان و په‌یوه‌ندییه‌كی پته‌و كه‌ له‌گه‌ڵیان پێكیهێناوبوو، ئه‌وی كردبوو به‌ جێگای متمانه‌یان و هه‌ر به‌مجۆره‌ له‌ ناو ریزی هاورێیانی پێشمه‌رگه‌ش دا گه‌ڵێك خوشه‌ویست بوو.

له‌ كاری پێشمه‌رگانه‌دا هاورێیه‌كی مونه‌زه‌م و فیداكار بوو له‌ چه‌ندین مه‌یدانی شه‌ر و خۆراگری چه‌كدارانه‌ی ئه‌و سه‌رده‌مە دا ئه‌وه‌ی سه‌لماندبوو.

رۆژی ١٣ی پووشپه‌ری ١٣٦٢ له‌ جه‌ریانی شه‌ری قاره‌مانانه‌ی پێشمه‌رگه‌كانی كۆمه‌ڵه‌ له‌گه‌ڵ هێزه‌كانی رژیمی ئیسلامی له‌ ئاوایی "سونجاخ"ی سه‌ر به‌ ناوچه‌ی مه‌هاباد ، هاورێ نوره‌دینی فه‌زلی ده‌كه‌وێته‌ به‌ر گولله‌ی دوژمن و گیانی له‌ رێگای ژیانی ئازاد و ئاسووده‌ و به‌رابه‌ر بۆ ئینسان فیدا ده‌كات.

یادی شۆرشگێری و فیداكارییه‌كانی بۆ هه‌تاهه‌تایه‌ زیندوه‌.