به‌یادی پێشمه‌رگه‌ی شۆڕشگێڕو گیانبازی كۆمه‌ڵه‌ هاوڕێ سدیقی ئافریانی

هاوڕێ سدیقی ئافریانی له‌ ناو بنه‌ماڵه‌یه‌كی زه‌حمه‌تكێش و ده‌س كورتی ئاوای ئافریانی ناوچه‌ی كامیاران له‌ دایك بوو ، هه‌ژاری و نه‌داری هۆكارێك بوو كه‌ نه‌یهێشت ته‌نانه‌ت ده‌وره‌ی سه‌ره‌تای خوێندن ته‌واو بكات و وه‌ك هه‌موو مناڵه‌ هه‌ژارێك ژیانی تێكه‌ڵ به‌ سه‌ختی و بێ مافی كرا .  ده‌ورانی تازه‌لاویشی به‌ كرێكاری تێپه‌ڕكرد تا به‌ڵكو ژیانی مه‌مره‌و مه‌ژی خۆی و بنه‌ماڵه‌كه‌ی دابین بكات .

ڕاپه‌ڕینی ساڵی ١٣٥٧ كه‌ بوو به‌هۆی ڕوخانی ڕژێمی شا ، هه‌روه‌ها بوونی كه‌ش و هه‌وای ئازادو سیاسی ئه‌و سه‌رده‌مه‌ مه‌جالێك بوو كه‌ هاوڕێ سدیق هه‌م وشیاری سیاسی خۆی بباته‌ سه‌ر ،هه‌م ده‌س بخاته‌ ناو ده‌ستی هاوچاره‌نووسانی و له‌ دژی زوڵم و سته‌می زاڵ به‌سه‌ر كۆمه‌ڵگا خه‌بات بكات .

ئه‌م هاوڕێ خۆشه‌ویسته‌مان به‌ ئاواتی گه‌یشتن به‌ مافه‌ ئینسانیه‌كانی له‌ ته‌فروتووناكردنی نیزامی چه‌وسێنه‌ری په‌هله‌وی به‌شداری كرد ، به‌ڵام زۆری پێ نه‌چوو كه‌له‌لایه‌ن ڕژێمی تازه‌وه‌ به‌ دڕندانه‌ترین شێوه‌ هێرش كرایه‌ سه‌ر ده‌سكه‌وته‌كانی ئه‌و شۆڕشه‌ ،هه‌ربۆیه‌ درێژه‌دان به‌ خه‌بات له‌ دژی كۆماری ئیسلامی بووبه‌ ئه‌وله‌ویه‌تی كاری سیاسی هاوڕێ سدیق .

هاوڕێ سدیق ده‌ركی به‌وه‌ كرد كه‌ كرێكاران و زه‌حمه‌تكێشان بۆ وه‌ده‌س هێنانی مافه‌ به‌رحه‌قه‌كانیان پێویستیان به‌ ڕێكخراو بوونه‌ ، هه‌ر بۆیه‌ به‌ چاوێكی كراوه‌ خۆی به‌ ئامانجی ڕزگاری به‌خشی كۆمه‌ڵه‌وه‌ گرێداو تادوا هه‌ناسه‌ی ژیانی بۆی تێكۆشا .

له‌ ڕه‌وتی ئه‌م خه‌باته‌ سیاسیه‌دا ، هاوڕێ سدیق ساڵی ١٣٦١ خۆی گه‌یانده‌ واحده‌كانی هێزی پێشمه‌رگه‌ی كۆمه‌ڵه‌ و دوای تێپه‌ڕكردنی سه‌ركه‌وتووانه‌ی ده‌وره‌ی ئامۆزشی سیاسی نیزامی له‌ په‌لی شه‌هیدانی كامیاران سازماندرا .

زوو زوو له‌ ناو دڵی هاوڕێیانی دا جێ خۆی كرده‌وه‌و بوو به‌ خۆشه‌ویستیان ، كه‌سێكی به‌ئینزیبات و دڵسۆز بوو وه‌ بۆ به‌رزكردنه‌وه‌ی ئاستی وشیاری سیاسی خۆی تێده‌كۆشا ، له‌ كاروباری نیزامی دا پێشمه‌رگه‌یه‌كی جه‌سوور و فیداكار بوو وه‌ له‌ چالاكی ئه‌و ده‌وره‌ی هاوڕێیانمان له‌ ناوچه‌ی هه‌ڵسوڕانی پێشڕه‌و ماندونه‌ناس بوو .

ئاخرین مه‌یدانی قاره‌مانه‌تی ئه‌م لاوه‌ كرێكاره‌ وشیاره‌ ، ئه‌م پێشمه‌رگه‌ شۆڕشگێڕه‌ی كۆمه‌ڵه‌ ، شه‌ڕی گه‌وره‌ و حه‌ماسی ئالانی سه‌رده‌شت له‌ ڕێكه‌وتی ٢٥ی ڕه‌زبه‌ری ساڵی ١٣٦٢ بوو كه‌ به‌و په‌ڕی ئیمان به‌ڕێبازی له‌ دژی سه‌ركوتگه‌رانی ڕژێمی ئیسلامی شه‌ڕی كرد و به‌ فیداكردنی گیانی خۆی له‌ پێناو ئازادی به‌شمه‌ینه‌تاندا چووه‌ ناو كاروانی گیانبه‌خت كردوانی ڕێگای سۆسیالیسمه‌وه‌ .

  به‌درێژه‌دان به‌ ئامانجی پیرۆزی هاوڕێ سدیقی ئافریانی ڕێز له‌یادی ئازیزو خۆشه‌ویستی ده‌گرین.