به‌ یادی هاورێی گیانبه‌خت كردوو كاك نه‌بی ره‌زائی ناسراو به‌ نه‌بی تازاوا پێشمه‌رگه‌ی پێشره‌و و وشیاری كۆمه‌ڵه‌

هاورێ نه‌بی سالی 1345 له‌ ئاوایی "تازاوای هێجان"ی ناوچه‌ی دیوانده‌ره‌ له‌ دایك بوو. له‌ سه‌ره‌تای منداڵییه‌وه‌ له‌گه‌ڵ كوێره‌وه‌ری و مه‌ینه‌ت و ژیانی تاڵ ئاشنا بوو. هاورێ نه‌بی سالی 1357 له‌ جه‌ره‌یانی گه‌شه‌ی ڕاپه‌رینی سه‌راسه‌ری ئێراندا تێكه‌ڵ به‌ خه‌باتی سیاسی بوو. دوای ڕاپه‌رین و له‌ كاتی لاوی دا چوو بۆ شاره‌كانی ده‌ره‌وه‌ی كوردستان و له‌وێ له‌ شیركه‌ته‌كان خه‌ریكی كرێكاری بوو. كاتێك چوو بۆ كار له‌ شاره‌كانی تری ئێران به‌ چه‌شنێكی هه‌مه‌لایه‌نه‌ و روون توانی سته‌م و زولم و زۆری چینی ده‌سه‌ڵات داری سه‌رمایه‌دار هه‌ست پێ بكات. له‌ به‌هاری سالی 1361دا هاته‌ ناو ریزی پێشمه‌رگه‌كانی كۆمه‌ڵه‌ و له‌ گوردانی كاوه‌ له‌ ناوچه‌ی دیوانده‌ره‌ هه‌ڵسووڕانی خۆی ده‌ست پێ كرد. په‌یوه‌ست بوون به‌ ریزی خه‌باتكارانی رێبازی رزگاری چینی كرێكار ئاڵ و گۆڕێكی بنه‌ڕه‌تی له‌ ژیانی هاورێ نه‌بی دا پێك هێنا. خۆی هه‌موو جارێك ئه‌م ئاڵ و گۆڕه‌ی وه‌ك گرینگترین و خۆشترین رووداوی ژیانی ناو لێ ده‌برد.

له‌ كاتی پێشمه‌رگایه‌تیدا تێكۆشه‌رێكی دڵسۆز بوو و تێ ده‌كۆشا زانیاری سیاسی خۆی به‌رێته‌ سه‌ر. رووخۆش بوو وه‌ هه‌موو كاتێك به‌ شه‌وق و شادمانییه‌وه‌ به‌ پێشوازی مه‌ئموریه‌ته‌ ته‌شكیلاتییه‌كانه‌وه‌ ده‌چوو. به‌هاری 1363 له‌گه‌ڵ په‌لی شه‌هید عه‌تا بۆ مه‌ئموریه‌تێكی ته‌شكیلاتی چووه‌ ناوچه‌ی سه‌رده‌شت و پاشان چوو بۆ ناوچه‌ی بانه‌ و له‌وێوه‌ بۆ ناوچه‌ی بۆكان.

هاورێ نه‌بی پێشمه‌رگه‌ی وشیار و تێكۆشه‌ری كۆمه‌ڵه‌ و زه‌حمه‌تكێشێكی ماندوویی نه‌ناس و پێشره‌و و یار و یاوه‌ری ره‌نجده‌ران له‌ ئاخرین شه‌ری دا كه‌ 16 سه‌عاتی خایاند له‌ به‌رزاییه‌كانی "ئاسمان بلاغی" بۆكان له‌ رۆژی 12ی پووشپه‌ری سالی 63دا له‌گه‌ڵ 4 هاورێ تێكۆشه‌ری گیانی به‌خت كرد و گیاین خۆی له‌ پێناو ئازادی زه‌حمه‌تكێشان و گه‌یشتن به‌ حكومه‌تی كرێكاریدا فیدا كرد.

هه‌ر به‌رز و به‌رێز بێت یادی هاورێ نه‌بی ره‌زائی و هه‌موو گیانبه‌خت كردووانی رێگای سووری سۆسیالیزم