بەرێز بێت یادی ئازیزی کرێکاری وشیار و پێشمەرگەی تێکۆشەری

کۆمەڵە هاورێ ئەحمەدی بەهرامی

هاورێ ئەحمەد ساڵی ١٣٤٦ هەتاوی لە کۆشی بنەماڵەیەکی زەحمەتکێشی ئاوایی ئاویهەنگی ناوچەی ژاوەرۆ چاوی بەژین هەڵهێناوە ، هەر لەو ئاوایە دەورەی سەرەتایی خوێندنی تەواو کردووە وپاشان بۆ درێژەدان بە خوێندن دەچێتە ئاوایی شویشە لە ناوچەی کەڵاتەرزان ، هاورێ ئەحمەد بە هۆی دەسکورتی بنەماڵەکەیەوە نەیتوانی درێژە بە خوێندن بدات وبەناچار دەستی لە خوێندن هەڵگرت وبۆ پەیداکردنی کار روی کردە شارەکانی دەرەوەی کوردستان ، ولە شارەکانی  بەندەرعەباس ، تاران ودەماوەند کرێکاری کرد ، کار لە شوینە جۆراوجۆرەکان وتێکەڵ بوون لە گەڵ هاوچینەکانی ودیتنی جەوسانەوەی لەرادەبەدەر وبێ مافی زۆرینەی خەڵکی کۆمەڵگا ، گەلیک پرسیاری لە مێشکی هاوری ئەحمەد دا هێنایە گۆر، وپەی بەو راستییە برد کە چینی کرێکار و خەڵکی چەوساوەی نێو کۆمەڵگا بۆ کۆتایی هێنان بەو بێعەداڵەتیە کۆمەڵایەتیە جگە لە یەکخستنی ریزەکانی بۆ خەبات لە دژی نیزامی زاڵمانە و چەوسێنەری سەرمایەداری رێگەیەکی دێکەی نیە . هەر لەو سەردەمانەدا بوو کە لەگەڵ مەسایلی سیاسی  ئاشنا بوو و بۆ وەدی هێنانی ئامانجەکانی خەباتی خۆی بە کۆمەڵەوە گرێدا ولێبراوانە بۆ بڵاو کردنەوەی ئامانج وسیاسەتەکانی کۆمەڵە تێدەکۆشا ، ساڵی ١٣٦٠ لە بەشی نهینی تەشکیلاتی کۆمەڵە سازمان درا و لێبراوانەتر لە جاران لە نێو هاوچینەکانی هەڵدەسورا . پاش ماوەیەک گەرایەوە بۆ ئاوایی ئاویهەنگ ولە  ماوەیەکی کورت دا ٣ جار لە لایەن هێزە بەکرێگیراوەکانی کۆماری ئیسلامییەوە دەسگیر کرا و سەرەنجام ناچاریان کرد لە مەقەری بەسیجی ئەو ئاواییە نیگابانی بدات ، ساڵی ١٣٦٢ لە گەڵ کۆمەلێک لە هاورییان بە پێی تەرحیکی بەرنامە بۆ دارێژراو بنکەی بەسیج لەو ئاواییە تەسلیمی پێشمەرگەکانی کۆمەڵە دەکەن و خۆیشیان بە ریزی پێشمەرگەکانی کۆمەڵە پەیوەست دەبن وتێکۆشانی خۆیان لە بەشی عەلەنی کۆمەڵەدا درێژە پێ دەدەن . ساڵی ١٣٦٣ دەبێتە ئەندامی حیزبی کومونیستی ئێران و هەر لەو ساڵەدا لە گوردانی ئارێز سازماندهی دەکرێت و وەک کرێکارێکی وشیار بۆ بردنە سەری وشیاری سیاسی خۆی وبەرێوە بردنی ئەرکەکانی تەشکیلات تێدەکۆشا وپێوەندییەکی نزیک ودوستانەی لە گەڵ زەحمەتکێشانی شوینی هەڵسورانی خۆی پێک دەهیناوە و بە زمانیکی ساکار ئەوانی بە ماف وبەرژەوەندییەکانیان ئاشنا دەکرد ، لە مەیدانی کاری نیزامیدا پێشمەرگەیەکی کارزان ولێهاتوو بوو ولە دەیان عەمەلیاتی گەورە وبچوک لە دژی هیزە داگیرکەرەکانی کۆماری ئیسلامی لە وانە گرتنی پایگای کۆماسی ، نگل ، کەڵاتی ، سپی بن و خواشت بە ورەیەکی بەرزەوە بەشداری کرد .

هاورێ ئەحمەد لەکۆتایی ساڵی ١٣٦٣ بۆ مەئمورییەتیکی تەشکیلاتی لە گەڵ هاورییانی پەلی شەهیدانی ژاوەرۆ رەوانەی ناوچەی بانە دەکریت و لەویش لە چەندین چالاکی نیزامی بەشداری دەکات ولە یەکیک لەو شەرانەدا بریندار دەبێت و پاش سارێژ بوونەوەی برینەکەی بە ریزی هاورییانی پەیوەست دەبێتەوە .

بە داخەوە رۆژی ١٩ ی مانگی جۆزەردانی ساڵی ١٣٦٦ لە شەریکی سەخت وقارەمانانە لەگەڵ هێزە داگیرکەرەکانی کۆماری ئیسلامی لە کۆڕەی میانە کەوتە بەر گوللە وگیانی لە پێناو نەمانی هەرچەشنە ستەم وچەوسانەوەیەک بەخت کرد و بەریزی گیانبەختکردوانی رێگای ئازادی وسوسیالیسم پەیوەست بوو.

یادی ئازیزی بە درێژەدانی رێگەی پڕ لە شانازی بەرز رادەگرین