به‌رز و به‌رێزه‌ یادی هاوڕێ ساڵحی ته‌نوومه‌ند

هاوڕێ ساڵح ته‌نوومه‌ند ساڵی ١٣١٤ی هه‌تاوی چاوی به‌ژین پشكووت. ئه‌و ئازیزه‌ ده‌ورانی خوێندنی خۆی به‌ گه‌لێك چه‌رمه‌سه‌ری له‌ ئاواییه‌كانی ناوچه‌كانی بۆكان و سه‌رده‌شت نایه‌ پشت سه‌ر و هه‌ر له‌و سه‌رده‌مه‌دا له‌گه‌ڵ مه‌سائیلی سیاسی ئاشنا بوو. ئه‌و له‌ ساڵی ١٣٤٥ به‌ تۆمه‌تی چالاكی سیاسی و خه‌بات له‌ دژی زوڵم و زۆرداری و نابه‌رابه‌رییه‌كانی رژیمی شاه‌نشاهی و هاوكاری له‌گه‌ڵ گروپی مینه‌شیم و عه‌بدووڵا موعینی ده‌ستگیر و به‌ دوو ساڵ زیندان مه‌حكوم كرا. له‌ پاش تێپه‌راندنی ده‌ورانی مه‌حكومیه‌ته‌كه‌ی و ئازاد بوونی له‌ به‌ندی رژیمی په‌هله‌وی، تا تێكرووخانی ئه‌و رژیمه‌ درێژه‌ی به‌ خه‌باتی سیاسی خۆی دا و دواتریش له‌ به‌ره‌به‌ری شۆرشی ١٣٥٧ی هه‌تاوی هاوڕێ و پێشڕه‌وی جه‌ماوه‌ری خرۆشاو بوو.

له‌ ساڵی ١٣٥٨ی هه‌تاوی له‌گه‌ڵ چه‌ند كه‌س له‌ هاوڕێیانی دامه‌زرێنه‌ری كۆمه‌ڵه‌، له‌وانه‌ هاوڕێی گیانبه‌ختكردوو دكتور جه‌عفه‌ری شه‌فیعی و هاوسه‌نگه‌رانی به‌ مه‌به‌ستی هۆشیار كردنه‌وه‌ و ئه‌ركی ئینسانی خۆی، ئاشنا بوو.

بوو به‌ یه‌كێك له‌ وته‌ بێژانی كۆمه‌ڵه‌ له‌ ناوچه‌ی گه‌وركایه‌تی. تا هه‌نووكه‌ش خه‌ڵكی ناوچه‌ی بۆكان و ده‌وروبه‌ر له‌وانه‌ قروچا و تورجان وته‌ دڵنشینه‌كانی هاوڕێ ساڵحیان له‌ یاد ماوه‌.

سه‌ره‌رای ئه‌وه‌یكه‌ نه‌خۆشی قه‌لبی بوو، له‌ هاوێنی ١٣٧٠دا به‌ تۆمه‌تی لایه‌نگری له‌ كۆمه‌ڵه‌ له‌ لایه‌ن رژیمی جمهوری ئیسلامییه‌وه‌ ده‌ستگیر و نێردرایه‌ زیندان. بۆ ماوه‌ی ١٠رۆژ خسترایه‌ ژێر توندوتیژترین و وه‌حشیانه‌ترین ئه‌شكه‌نجه‌كان.

وێرای هه‌موو ئه‌و ئه‌شكه‌نجانه‌ش ده‌ست و پێوه‌نده‌كانی رژیم نه‌یانتوانی هیچ ئێعترافێكی لێ بستێنن و دوای ١٠ رۆژ ئازاد كرا.

هاوڕێ ساڵحی ته‌نوومه‌ند له‌ نێوان خه‌ڵكی شۆڕشگێڕ و جه‌ماوه‌ری زه‌حمه‌تكێشی ناوچه‌كه‌دا سیمایه‌كی خۆشنا و دڵێكی لێوانلێوو له‌ باوه‌ری خه‌بات بوو، بۆ هێنانه‌دی ئارمانی چینی كرێكار و سۆسیالیزم و به‌رابه‌ری.

به‌ڵام به‌داخێكی گرانه‌وه‌، به‌هۆی نه‌خۆشی قه‌لبی له‌ ته‌مه‌نی ٧٣ ساڵی دا له‌ رێكه‌وتی ١٥ی به‌فرانباری ١٣٨٧ی هه‌تاوی دا گیانی به‌ختكردوو له‌ نێوان خه‌م و په‌ژاره‌ی دۆستان و ئاشنایان و خه‌ڵكی ناوچه‌كه‌دا به‌خاك سپێردار.

به‌رز و به‌رێزه‌ یادی هاوڕێ ساڵحی ته‌نوومه‌ند و سه‌رجه‌م گیانبه‌ختكردووانی رێبازی سۆسیالیزم.